Òbres tà abilitar un bar municipau en un magazèm

Er Ajuntament de Vilamòs a trèt a licitacion es òbres tà reabilitar un magazèm municipau de planta baisha e que pogue devier un bar de gestion municipau tà aufrir servici ath pòble. Era reforma respectarà es paramètres urbanistics actuaus e era naua distribucion contemple ua zòna de bar, ua barra, ua codina e uns servicis. Des der airau principau, s’accedirà ara codina e as servicis. Era actuacion a previst de dotar aguesti dus espacis (era barra e era codina) damb tot tipe d’equipaments de besonh tà desvolopar aguesta activitat. Exterioraments, eth projècte contemple ua estructuar tà previer zònes de ombra damb ua pergòla, en tot milhorar atau eth confòrt des clients en epòques de calor. Es òbres tà transformar er equipament an ua prevision d’inversion de 115.000 èuros. Aurà calefaccion a trauès d’ua caudèra de pellets que se collocarà en ua zòna pròplèu ar accès ath bar, e dus difusors d’aire penjadi deth tet, segontes se pòt apreciar en projècte. Er objectiu deth consistòri ei eth de poder adjudicar era reforma dera planta deth magazèm municipau, qu’empleguen es membres dera brigada, pendent eth prumèr trimèstre de 2025 entà auer es òbres premanides en primauera o principis d’ostieu.