Un diccionari en linha entà refortilhar er aranés

Er Institut d’Estudis Aranesi-Acadèmia Aranesa dera Lengua Occitana a presentat aguesta setmana eth nau Diccionari der Occitan Aranés (DOA), ua airina de consulta lexicografica en linha qu’aufrís ath torn de 15.500 entrades e ei dirigida entath public generau. Eth DOA, que pòt consultar-se a trauès dera pagina web www.doa.institutestudisaranesi.cat se base en corpus lexic des tres òbres normatives editades pera Acadèmia. Se tracte deth Diccionari der aranés, eth Vocabulari dera tecnologia dera informacion e eth Vocabulari d’espòrts d’iuèrn, ath delà d’includir era ampliacion deth Diccionari publicada en 2022.

Aguesta naua airina permet ua recerca basica e ua recerca auançada, en tot facilitar era consulta d’articles per entrada o definicion. Segontes Miquèu Segalàs, president dera Seccion Aranesa, eth DOA representa ua ita importanta entara lengua occitana, en tot proporcionar un recors modèrn, accessible e practic en airau digitau. Segalàs ahig que “volem qu’aguest sigue un recors certaments util entà toti aqueri qu’emplegam era nòsta lengua, entara societat aranesa, administracions, institucions, associacions e comunitat occitanparlant en linhes generaus”.

Eth projècte a estat possible gràcies ath supòrt der Institut entath Desvolopament der Alt Pirenèu e Aran (IDAPA) e de Baqueira-Beret. Era Acadèmia se compromet a actualizar e ampliar progressivaments eth diccionari damb recorsi lingüistics addicionaus qu’encara se trapen sonque en format papèr o pdf e damb es entrades que se remassen en futur, en tot mantier-lo actualizat.

Eth prumèr diccionari en aranés publicat en papèr siguec en an 2019, tanben editat pera Acadèmia.