Era glèisa de Sant Andrèu se cauharà damb biomassa

Era glèisa de Sant Andrèu de Salardú, en Naut Aran, se modernizarà damb un sistèma de cauhament sostenible. Er ajuntament a aprovat un projècte entà connectar eth temple ath hilat de calor urban (district heating) alimentat per biomassa, qu’a previst d’estrear abans der iuèrn que vie. Aufrirà tanben servici ara sala polivalenta, era escòla Ruda, era piscina e eth pròpri ajuntament, en tot promòir atau era eficiéncia energetica e era sostenibilitat en bastisses publiques deth municipi. Era glèisa se cauhe aué dia damb dispositius electrics.

Eth projècte, damb un pressupòst de 39.633,90 èuros, contemple era installacion d’ua subestacion d’escambi termic damb ua poténcia de 51 kW, que permeterà cauhar er interior dera glèisa de forma eficienta e respectuosa damb eth miei ambient, ath madeish viatge que permeterà controlar eth nivèu d’umiditat.

Eth nau sistèma substituirà es antics aerotèrms electrics, en tot milhorar significativaments era eficiéncia energetica der edifici. S’installaràn aerocauhadors alimentadi per aigua cauda, cada un damb ua poténcia calorifica de 11,6 kW. Aguesti dispositius distribuiràn era calor de forma uniforme per tot er espaci interior dera glèisa sense generar tapatge. Era installacion includís un sistèma de tuèus de polietilèn multicapa, isoladi termicaments, que connectaràn era subestacion damb es aerocauhadors. Ath delà, s’implementarà un sistèma de contròl automatizat entà optimizar eth foncionament deth cauhament segontes es besonhs deth temple religiós.

Aguest projècte non sonque milhorarà eth comfòrt termic entàs religiosi e visitaires dera glèisa de Sant Andrèu, mès tanben contribuirà a redusir era peada de carbòni deth municipi. Er emplec dera biomassa coma hònt d’energia entath hilat de calor supause un profitament de recorsi locaus e un amendriment ena dependéncia de combustibles fossils, pr’amor que s’alimentarà damb husta procedenta des bòsqui dera Val d’Aran.