Eth musèu dera Casa deth Haro daurirà eth pròplèu an

Era Casa deth Haro de Les daurirà coma centre d’interpretacion des Hèstes deth Huec en 2025. Eth Conselh Generau aprovèc recentaments eth projècte executiu tà museitzar eth nau espaci expositiu, que gestionarà era madeisha corporacion a trauès deth hilat de Musèus dera Val d’Aran. Era mòstra compdarà damb un dessenh minimalista e incorporarà elements audiovisuaus coma projeccions, taules interactives e locucions sonores, segontes recuelh eth projècte iniciau. 

Es contenguts deth recorregut se dividiràn en tres airaus, que serviràn entà contextualizar aguesta hèsta de culte ath huec en tot eth Pirenèu, des d’Aran -a on Les e Arties son es uniques poblacions que son aué dia testimònis dera tradicion-, e enquia arribar ara Crema deth Haro de Les, damb eth prètzhèt de reafirmar era relacion qu’era gent deth territòri mantie damb era hèsta atau coma dar a co-néisher era tradicion as visitaires e incitar-les a que tornen tà Sant Joan. Entre es recorsi damb es que compdarà era mòstra, destaque ua vintea de reproduccions de halhes e haros qu’apertien a hèstes de diuèrses poblacions pirenaiques. Eth baile de Les, Andreu Cortés, avalorèc positivaments eth projècte, que “potencie part dera nòsta esséncia e servirà entà promòir eth nòste patrimòni culturau”. En aguest sens, Cortés auancèc que se trapen en tot desvolopar un projècte complementari entà vincular es visites ath musèu damb eth casc antic dera poblacion e eth castèth medievau, que date d’entre es sègles X e XI e qu’a estat reabilitat recentaments. 

Cau rebrembar qu’era Casa deth Haro ère antigaments era sedença dera bibliotèca municipau. Siguec ampliada e reabilitada en 2021 damb ua inversion d’uns 300.000 èuros deth departament de Cultura. Era sua inauguracion coma musèu coincidirà damb eth detzau aniversari dera candidatura transfronterèra de 63 pòbles entà declarar es Halhes Patrimòni Immateriau dera Umanitat dera Unesco, que siguec fin finau aprovada en 2015.