Remontadors entar ostieu

Es pernoctacions enes lotjaments a pè de pistes (còta 1.500) dera estacion de montanha de Baqueira Beret s’an incrementat aguest ostieu un 15 % en cas des estades des apartaments e un 10 % en otèl Montarto, especializat en ciclisme, qu’a aufrit tot tipe de servicis entàs aficionats ad aguest espòrt. Eth renauiment d’aguest establiment, era organizacion d’activitats de natura en complèx de montanha e d’auti servicis an sedusit mès as toristes enes mesi de junhsèga e agost.

De hèt, era estacion a aufrit un ampli ventalh d’activitats des deth senderisme, bicicleta de montanha, iòga, concèrts jos es estèles, ath delà de dispausar de dus remontadors en foncionament. En çò que tanh ara aufèrta de BTT en complèx s’an abilitat nau camins que se somen ar extens hilat de camins de lèu 1.000 quilomètres ena Val d’Aran. Eth complèx a dubèrt es remontadors deth Clòt der Os, en Beret, e Bosque, en Baqueira, entà rotes a pè enes zònes de nauta montanha e tanben entà arribar as circuits de BTT e eth nau traçat Telesèra qu’a auut un gran succès.Mès enlà des activitats outdoor, eth complèx tanben a aufrit en agost classes de iòga en jardin der otèl Montarto es dissabtes, e era activitat nocturna Net des Perseides, hestejada eth deluns 12 d’agost en restaurant Pla de Beret que demorèc dubèrt entà aufrir sopars e un concèrt. Eth remontador Clòt der Os se dauric en orari nocturn entà pujar entà còtes nautes e gaudir dera ploja d’estèles elissantes. Destaquèc eth Trail Festival Baqueira Beret e eth She Bikes Gravity Experience en Baqueira. Era estacion ei centrada dejà ena sason d’iuèrn 2024-2025 e trabalhe ena milhora de pistes e servicis tàs sòns clients. Tanben a metut ara venda eth forfait de temporada e era centrau de resèrves.