Caudèra de biomassa ena escòla de Les aguest iuèrn

Er Ajuntament de Les a entrat ena rècta finau des òbres tà milhorar era eficiéncia energetica dera escòla Alejandro Casona. Aguest ostiu a substituït er enlumenat deth centre damb tecnologia LED e a bastit es principaus circuits damb es que foncionarà era caudèra de biomassa que cauharà es installacions. Eth baile deth municipi, Andreu Cortés, expliquèc que confidauen en poder meter-la en marcha aguest madeish iuèrn. Era naua installacion, damb ua capacitat termica de 300 kW, les permeterà un estauvi en combustible d’enquiath 60 %. Dejà s’a bastit era plataforma sus era que s’installarà era caudèra e era sièja, damb capacitat utila de 60 m³, ena zòna de Paisàs e que facilitarà er accès entà recargar-la sense qu’afècte era activitat ordinària deth centre, mentre er aparelh arribarà des d’Àustria enes pròplèu setmanes. Era sua poténcia se complementarà damb era actuau caudèra de gas pendent es ondades de heired. Eth projècte, damb un pressupòst de 200.000 èuros, s’a finançat damb eth programa DUS5000 Next Generation e ei alinhat damb eth projècte de transicion energetica deth consistòri e eth Conselh entà méter en valor es recorsi deth territòri.