Eth Conselh amplie a sies era plantilha d'auxiliars d'aranés enes escòles

Eth Conselh Generau d’Aran a duplicat entad aguest cors escolar era plantilha d’auxiliars de lengua aranesa en centres educatius. Se tracte d’ua figura era foncion dera quau ei facilitar qu’es mès petiti poguen comunicar-se en aranés entre eri, damb eth prètzhèt de promòir er emplec dera lengua pròpria d’Aran autant laguens coma dehòra des aules. Er an passat i auie un totau de tres auxiliars, qu’aportauen supòrt principaument as cicles d’Educacion Infantila des sèt centres educatius deth territòri de forma itineranta. Enguan era plantilha arribe enquiàs sies, çò que permeterà tanben corbir es dus prumèri corsi d’Educacion Primària.

Aguesti professionaus tanben contribuïssen a ua atencion mès individualizada des alumnes enes aules, mentre que s’encueden de dinamizar era ora deth pati mejançant jòcs e activitats guidades, entre d’auti. Eth sòn papèr ei fonamentau entà qu’es alumnes aprenguen nau vocabulari en aranés e s’acostumen a emplegar era lengua de forma abituau.