Reformen 1,5 km deth passeig fluviau entre Vielha e Betren

Er Ajuntament de Vielha e Mijaran començarà en octobre es òbres tà milhorar eth marge esquèr deth passeig fluviau der arriu Garona ath sòn pas per Vielha e Betren. Er objectiu ei eth de crear un recorregut entà passejar e practicar espòrt, mès segur, adaptat e enlumenat. Aguesta actuacion ei era dusaua fasa deth projècte iniciat en an 2019 entà crear un recorregut urban saludable, damb eth prètzhèt que pogue èster gaudit pera mainadèra, familhes, gent grana e esportistes damb un totau de 1,5 quilomètres e se calcule qu’es òbres finalizaràn enguan.

Concretaments, eth tram objècte des òbres se trape entre eth carrèr Querimònia de Vielha e eth Pònt de Betren. Era intervencion consistís ena retirada des trepadèrs de jardin que i a ath long deth camin en Vielha, que limiten er espaci en dolentes condicions, e d’auta part damb corsères estretes entre arbes entre eth parcatge e er arriu Garona. Aguesta prumèra part des òbres compren eth tram deth passeig fluviau entre eth carrèr Querimònia e era avenguda deth Solan. En tram de Betren i a ua part qu’ei limitada damb un mur d’ormigon e en d’auti emplaçaments a format talusi que se mingen eth camin. Grana part des zònes de nautor dejà dispausen d’ua barana de husta entà evitar queigudes.Un viatge limpiada era zòna, se pavimentarà damb ua amplitud d’entre es 2 e es 2,5 mètres. Se milhoraràn tanben es murs de contencion deth camin damb escuelhères de pèira, mentre qu’enes zònes de mès nautor se protegirà era possible queiguda damb baranes de husta. En tram deth passeig de Betren se montaràn balises cada 10 mètres entà enlumenar eth camin enquiath pònt de Betren. Eth projècte s’adjudiquèc en noveme de 2022 per un impòrt de 344.000 èuros damb IVA.