Talent digitau, convidat a víuer 10 dies en Vielha

Un totau de 10 emprenedors deth sector digitau visitaràn era Val d’Aran deth 13 ath 27 d’octobre en marc deth Catalunya Rural Hub, qu’organize eth Conselh Generau d’Aran mejançant eth hub d’innovacion HèPIC. Era iniciativa vò aufrir as participaires era possibilitat de trabalhar en remòt pendent dues setmanes en coworking de HèPIC en Vielha, coma se se tractèsse d’ua pròva pilòt sus coma se viu en tot teletrabalhar enes zònes de montanha damb eth prètzhèt d’atrèir talent digitau ath territòri. Clara Estrada, tecnica d’innovacion de HèPIC, expliquèc que “presentèren era sua candidatura entà participar en projècte 32 persones, per çò que mos calec realizar un procès de seleccion basat enes sòns curriculums”. Destaquèc qu’era màger part son expèrts en naues tecnologies, enginhaires o emprenedors, que se lotjaràn en apartaments pendent era sua estada.

Pendent eth programa s’an previst trobades damb es enterpreses e es iniciatives mès destacades deth territòri entà dar a conéisher es oportunitats de negòci dera zòna e es rèptes que s’an plantejat, atau coma activitats ludiques, esportives e culturaus.