Òbres tà milhorar eth hilat d'aigua e sanejament de Vielha

Er Ajuntament de Vielha e Mijaran a iniciat es trabalhs de milhora dera accessibilitat e adaptacion des hilats deth servici d’aigua correnta e aigües residuaus en tram baish dera avenguda Baile Calbetó Barra de Vielha. Eth projècte compde damb un pressupòst de 191.000 èuros (damb IVA) e serà prèst abans dera sason d’iuèrn. Includís diuèrses intervencions tà milhorar eth hilat d’aigua. En çò que tanh ath sanejament, s’amiarà a tèrme un hilat separat entà qu’es aigües de ploja deth carrèr Quate Lòcs vagen directaments tar arriu Garona, mentre qu’es aigües lordes anaràn tath hilat generau. D’un aute costat, eth hilat d’aigua correnta s’actualizarà damb materiaus mès adequats entath sòn subministrament e s’installaràn claus de pas ar inici e finau dera actuacion. Fin finau, se haràn milhores en paviment, damb era reforma des trepadèrs de granit en mau estat, ath delà de milhorar es guàs.