Es joeni apòsten per Aran en un debat sus eth sòn futur

Dar votz a joeni qu’an apostat per desvolopar eth sòn projècte vitau en Pirenèu. Aqueth siguec er objectiu dera taula redona celebrada ager ena Val d’Aran en marc dera onzau edicion des Jornades entara Excelléncia, ara qu’assistiren un gran numèro d’estudiants coma public. Er acte, qu’auec lòc ena Audiovisuau de Vielha, compdèc damb era participacion de diuèrsi joeni, quaqui emprenedors, que compartiren e debatiren sus es sues aspiracions e es rèptes qu’an afrontat tà desvolopar eth sòn projècte vitau en zònes de montanha.

En concrèt, ena session Bastir eth deman. Joenessa e emprenedoria i participèren Clara Gibert, usatgèra deth coworking dera Val d’Aran e responsabla de marketing dera marca de cauçat NNormal, fondada per Kilian Jornet; Jaime Varela, fotograf e videograf freelance e Arnau Cases, cofondador dera agéncia de comunicacion Cordada Outdoor. Toti coincidiren ena satisfaccion e es granes oportunitats que pòt aufrir un entorn coma Aran se un a determinacion, atau coma era aufèrta formativa dera zòna e era digitalizacion deth mercat laborau. Er acte includic tanben un debat sus era aufèrta esportiva e eth teishiut associatiu autant ena Val coma ena rèsta de comarques deth Pirenèu. I participèren Estafnia Revilla, tecnica der airau de Joenessa deth Conselh Generau; Martí Alonso, director dera corsa Infinite Race Val d’Aran, e Ruben Vivancos, representant dera comission de hèstes de Bossòst. Era Sindica d’Aran, Maria Vergés, presidic er acte de clausura en qu’instèc as joeni a “implicar-se en teishut sociau deth territòri” e a “préner era iniciativa”. “Vòsati ètz eth futur”, concludic.