Nau espaci de 'coworking' en Es Bòrdes tà atrèir talent

Er Ajuntament d’Es Bòrdes vò qu’eth sòn municipi pogue devier un lòc mès atractiu tà que naui emprenedors poguen establir-se ena zòna, damb eth prètzhèt d’afrontar eth rèpte demografic. Entre es projèctes damb es que trabalhe, en destaque un tà abilitar un espaci de coworking ena prumèr planta deth consistòri, plaçat en centre dera localitat, ath cant de d’auti edificis publics e pròplèus ara carretèra principau que comunique damb eth territòri. Vò atau dotar eth municipi d’un espaci collaboratiu, apte entath trabalh d’emprenedors e associacions d’empresaris, a on es qu’ac desiren poguen elaborar es sòns productes e servicis, en tot contribuïr ath sòn viatge a dinamizar eth hilat empresariau d’Aran. Ac projècte tanben coma ua forma de desestacionalizar era economia deth parçan, en tot atrèir estudiants e visitaires.

Era bailessa deth municipi, Rosa Maria Mirat, expliquèc qu’an previst amiar a tèrme es actuacions, coma tard, a darreries deth pròplèu ostiu. Detalhèc que plantegèren era posibilitat de crear aquiu ua escòla d’oficis tradicionaus aranesi, mès “èm un municipi fòrça petit e peth moment non dispausam des recorsi tà materializar eth projècte”. Era naua sala, ena prumèra planta, serà equipada damb un office, un burèu e ua sala d’amassades, ath delà der espaci de coworking, e era sua reabilitacion compde damb un pressupòst de licitacion de 110.000 èuros. D’un aute costat, eth consistòri ultime es preparatius tà abilitar ena part nauta deth pròpri Ajuntament d’Es Bòrdes ua sala sociau tà vesins e entitats. A previst de bastir aquiu un servici adaptat e ua codina.