Naua captacion e òbres en depòsit de Casau

Era captacion d’aigua potabla des deth barranc des Comes enquiath nuclèu de Casau, en Vielha, ei destruida e, en conseqüéncia, eth depòsit ei dehòra de servici. Entà aufrir ath pòble era resèrva d’aigua de besonh entath corrècte foncionament deth hilat de provediment, tanben en epòques de maximala poblacion, eth consistòri vò recuperar aguesta captacion e eth depòsit.

Entà hè’c, serà de besonh abilitar un nau punt tà arténher aigua des deth barranc e hèr ua canalizacion enquiath depòsit. En çò que tanh ad aguest, bastit hè mès d’un decènni, non a estat emplegat enes darrèri ueit an.

Andús sistèmes idraulics se renauiràn tà adaptar-les ara normativa de provediment d’aigua

Eth baile de Vielha e Mijaran, Juan Antonio Serrano, expliquèc que, tà tornar a méter en servici aguest depòsit, calerà adaptar-lo ara normativa en matèria de provediment d’aigua e hèr modificacions estructuraus tà facilitar ath maximom era explotacion, ath delà d’adequar eth hilat des d’aguest punt enquiath municipi.

En aguest sens, ei previst dividir eth depòsit en dues parts, de forma qu’es trabalhs de manteniment e neteja se poguen hèr sense auer de talhar eth provediment d’aigua potabla. Atau madeish, s’installarà un caudaulimètre electromagnetic de gessuda tà mesurar en continu era aigua provedida ara Entitat Municipau Descentralizada (EMD) de Casau. Aguesti trabalhs an prevista ua inversion de 47.738 èuros e aurien d’alongar-se mès de sies mesi. “Aguest depòsit pòrte ans sense usatge e s’adaptarà ara normativa e damb es maximales prestacions”, diguec.

Eth projècte contemple dotar ath vas d’un sistèma de cloracion damb un sistèma de telemetria tà controlar es paramètres de clòr, eth nivèu d’aigua, temps de resèrva, eth caudau de gessuda e eth volum provedit, entre d’auti.

Tanben ei previst de renauir totes es casetes des valvules que siguen en estat maumerent peth pas deth temps e se repararàn es actuaus filtracions d’aigua tà evitar futures pèrtes.