Desèrta era subasta dera parcèlla en Baqueira 1.500

Er Ajuntament de Naut Aran non a recebut cap aufèrta ena subasta d’ua finca de 400 mètres ena zòna de Baqueira, a 700 mètres deth telecabina que connècte es pistes d’esquí. Eth prètz de gessuda dera parcèlla, damb ua superfícia edificabla de 190 m2, ère de 640.000 èuros. Eth motiu dera venda ère que se plantejaue eth desvolopament urbanistic dera zòna e eth consistòri volie destinar es sòs ath hons tà crear viuenda assequible e d’autes politiques vinculades ad aguesta matèria.

Mentre decidís se repetís era subasta damb un prètz de gessuda inferior, eth consistòri trabalhe dejà ena alienacion de d’autes tres parcèlles en Bagergue. Son d’uns 300m2 cada ua e son previstes aquiu viuendes unifamilhares. Es sues dimensions, d’uns 300m2, impossibiliten destinar-les a espacis entath loguèr assequible e er ajuntament non pòt assumir es còsti tà bastir de zèro en aguest lòc. Eth sòn prètz de gessuda ei de 257.000 èuros, 265.000 èuros e 287.000 èuros, respectivaments. Es sòs que s’artenhen damb era venda se destinaràn a finançar eth futur Centre Civic e Sociau de Salardú, deth quau recentaments s’a adjudicat era direccion d’òbra e projècte executiu.