Naut Aran tornarà a licitar era finca en Baqueira 1.500

Er Ajuntament de Naut Aran tornarà a trèir a subasta eth solar edificable plaçat en Baqueira, ath cant deth parcatge dera còta 1.500, peth madeish prètz peth qu’era subasta dera parcèlla demorèc desèrta en mes anterior. Atau, eth prètz de gessuda serà nauament de 640.108,88€. Sonque i aurà ua diferéncia damb eth procès de subasta anterior e ei que s’a incrementat en un 10% era garantia provisionau de besonh tà participar en tramit, en tot èster de 192.032,66€. Era rèsta de clausules se mantien sense modificacions. En çò que tanh ath solar, ei resultat deth projècte de reparcellacion deth PE-1 de Baqueira. Eth motiu dera sua veda ei qu’ei previst eth desvolopament urbanistic dera zòna. Era finca mesure 410 m2, des quaus 190 son edificables, en tot èster ua residéncia unifamilhara era permetuda en terren. Per un aute costat, s’a aprovat eth projècte iniciau tà installar ua naua rampa calefactabla en Salardú. Se plaçarà en Camin de Pujo, damb eth prètzhèt de guanhar seguretat en paviment quan i age nhèu o gèu. Foncionarà damb energia dera futura centrau termica de biomassa associada a un sistèma de distribucion de calor ena localitat.