Vielha incorporarà lums LED damb autogestion

Er Ajuntament de Vielha e Mijaran premanís era modernizacion deth sòn hilat d’enlumenat public exterior, damb eth prètzhèt de milhorar era eficiéncia energetica e redusir era contaminacion luminica en municipi. Eth projècte contemple era substitucion de 1.942 luminàries existentes per tecnologia LED de darrèra generacion, e era implementacion d’un sistèma de telegestion enes 37 quadres de contròl actius. Aguesta tecnologa permeterà regular era intensitat luminca en foncion des besonhs, en tot optimizar eth consum energetic e en tot milhorar era qualitat deth servici. Tanben permeterà conéisher quinsevolh tipe de pana que pogue ocasionar-se ena totalitat deth hilat, en tot facilitar era reparacion e era reduccion de còsti. Era inversion totau deth projècte s’apròpe ath milion d’èuros, des quaus ua grana part correspon ath còst d’execucion des òbres, qu’amiarà a tèrme era enterpresa Rubatec SA. Entre es objectius principaus deth projècte se trape era reduccion deth consum energetic e des emissions de dioxid de carbòni, en tot contribusir ath desvolopament d’un modèl energetic mès sostenible. Ath delà, era milhorar deth sistèma d’enlumenat public permeterà incrementar era seguretat viau e eth confòrt visuau enes espacis publics. Eth contracte s’a dividit en dus lòts: un tà Vielha, qu’includís 17 quadres damb es que controlar 1.163 punts de lum, e er aute tàs dotze pòbles dera rèsta deth municipi, damb 21 quadres electrics e 1.158 punts de lum. Eth projècte s’executarà en un tèrme estimat de cinc mesi, que supausarà tà Vielha e Mijaran ua peada fèrma entara transicion energetica, en tot apostar pera eficiéncia e era innovacion tecnologica en benefici des sòns abitants e eth mèdi ambient.