NAUT ARAN
Descorbissen en Wallapop a un lairon d'esquís
Panèc ues taules de nauta gama a un instructor en Baqueira. Les metec ara venda londeman en Madrid e siguec detengut
Es esquís Salomon metudi ara venda en Wallapop per 400 èuros. - WALLAPOP
Es pistes d’esquí, a on règne un ambient esportiu e recreatiu, non demoren exemptes de delictes. Exemple d’aquerò ei un cas recentaments ocorrut en Baqueira-Beret: un lairon panèc uns esquís valoradi en mès de 1.000 èuros a un professor dera estacion, concretaments ena zòna de Val de Ruda. Eth panatòri auec lòc era setmana passada, mès eth delincuent siguec detengut londeman en Madrid gràcies a un rapid operatiu dera Guàrdia Civila, segontes informèc El Mundo. Era investigacion se metec en foncionament dempús dera denóncia deth professor afectat e era collaboracion de Juango Ospina, un advocat penalista client deth pròpri perjudicat, qui ajudèc a coordinar era actuacion policiau.
Eth lairon cometec un error cruciau qu’accelerèc era sua captura: sagèc de véner ena plataforma Wallapop es esquís panadi pògues ores dempús deth succès, en tot fixar un prètz de sonque 400 èuros, fòrça per dejós deth sòn valor reau. Aguest hèt lheuèc sospites e facilitèc era labor des agents, que, suposadaments de paisan, se hèren passar per crompadors interessadi. Dempús de contactar damb eth venedor, confirmèren que se tractaue deth materiau panat.
Es agents concertèren ua trobada en Madrid tà verificar eth producte e, un viatge comprovat qu’èren es esquís panadi, procediren ara sua detencion en acte. Gràcies ad aguesta rapida intervencion, eth professor d’esquí a pogut recuperar es sues airines de trabalh.
Aguest incident mòstre qu’aguest tipe de materiau esportiu, de naut prètz, pòt devier un objectiu facil entàs lairons. Pera sua part, es Mòssos d’Esquadra assegurèren que son “puntuaus, fòrça pòc freqüenti” aguest tipe de delictes enes estacions d’esquí deth Pirenèu de Lhèida.
