Unitat d’Aran tamb CiU

Qu’er espaci polític s’està desplaçant ei ua realitat. Qu’es partits polítics s’estàn desplaçant ideologicament ei tanben ua realitat. Era pròva mès evidenta s’a produsit aguesti darrèri dies tamb era actuacion d’Unitat d’Aran ena Diputacion de Lleida. Unitat d’Aran a manifestat que cèrque un acòrd d’estabilitat tamb eth govèrn de CiU ena Diputacion de Lleida.

Mès, non ère CiU un pàrtit corrupte? Non ère CiU ena dreta politica? Non ère CiU, era qu’auie pòca sensibilitat tamb eth municipalisme? Que non ei CiU ja independentista? Que n’auem sentut de díder “animalades” e “mentires” referents a CiU. E ara? Ja mos auem tornat boni? Me’n alegri. Bona notícia!

Ei evident qu’era Diputacion de Lleida, governada per CiU, a hèt tanben mèrits entà qu’aguesta situacion se produsisque. Es dues mès granes subvencions a Ajuntaments aranesi an estat tàs Ajuntaments de Les e de Vielha e Mijaran, curiosament governats per Unitat d’Aran. Aguest hèt, demòstre que CiU non ei sectària, que non guarde qui govèrne. Suposi que i seratz d’acòrd toti es lectors vertat? En sò segur que quan acabe era legislatura era Diputacion de Lleida tanben aurà guardat e prioritzat a Naut Aran, Es Bòrdes, Vilamòs, Arres e era resta.

Feliciti a Unitat d’Aran perquè cèrque un acòrd d’estabilitat que s’apròpe as tesis nacionalistes, s’apròpe ath Dret a decidir e s’apròpe ath centre polític. Igual ei eth moment de plantejar un Congrès der Aranesisme entà potenciar eth País, era sua identitat, era sua lengua, eth sòn autogovèrn e marcar es linhes comunes de futur que beneficiaràn a toti es aranesi e araneses.

Credetz que mos diràn que òc? Ac demoram!