Bòrdes e Cabanes (II)

Eth dijaus passat se confirmèc. I a dus models de desvolopament entath municipi de Vielha e Mijaran. Era majoria absoluta der Alcalde Serrano servic entà imposar eth sòn, e coma tostemp, sense cap dialòg, ne volentat d’acòrd en mès de dus ans de govèrn. Sense voler entrar en detalhs, sonque les convidi a que sauven aguesta columna, amassa tamb era prumèra de hèr quinze dies e era finau que i aurà enes pròplèus setmanes, entà rebrembar tristament era decision qu’a pres er Alcalde Serrano. Veiram enes pròplèus ans es conseqüéncies d’aguesta decision. Mès, er absolutisme, era volentat de machacar ar adverssari, ei en aguest govèrn de Vielha e Mijaran present en cadua des sues decisions. Malaurosament, mentrestant descueden er interés generau e sustot era vision a long termini. Eth neoliberalisme que practique er Alcalde Serrano serie premiat enes Estats Units. D’un patrimòni protegit coma son es montanhes enquiara ara sua liure mercantilitzacion a trauèrs des Bòrdes e Cabanes en tot deishar desvolopar activitat economica liurement (excepte Hotels e Torisme Rurau). Contradictòri s’auem en compde que està imposant, enes pòbles deth muinicipi, ath sector dera osteleria (que represente eth 85% dera nòsta riquesa) uns critèris opressius que arren an a vèir en coheréncia tamb aguesta liberalitzacion des Bòrdes e Cabanes. Per tant, a uns òc e as auti non. Mès, non sa’c perden, mos diràn qu’ac van a regular e que serà quasi impossible. Coma ac hèsquen igual que tamb era publicitat enes pannèus deth cant der estudi e Palai d’Espòrts, mos tocarà de crompar “Barceló”. En conclusion, premiat enes Estats Units e autonomentats d’esquerres e progressistes en Aran.