Davos 2018

Aguesta petita “ciutat e comuna” Suïssa s’a convertit enes darrèrs ans en escenari portantvèu des nomentats líders economics e polítics a nivèu mondiau a trauèrs deth Foro Economic e Mondiau.

Ei curiós vèir coma se ditz tant e non s’apròve arren. Ei curiós vèir a líders polítics e economics e non i a altavèus entà líders transformadors. Ei curiós liéger coma se pregone un discors de cara a tot eth mon e dempús de pòrtes tà laguens, hènt çò de contrari. Ei tot tant curiós, que tot obedís mès a postureo personau, qu’a interès de melhora ena governança globau.

Trump ei era diana dera critica peth sòn proteccionisme, nacionalisme e eth sòn populisme. Merkel era líder que respecten toti. Macron era sensacion que toti se cren. China ei aquera amenaça entà occident que sonque se critique quan cau protegir-se d’era, quan interèsse ei ua superpoténcia.

E mentrestant, era pregunta que s’auríen de hèr (es autonomenats líders) ei: era gent deth carrèr que pense de Foro Davos? Donques, ben ben arren. Non li hèn cas. Saben dera sua celebracion perque mos inonden de notícies per toti es canaus. Totes aqueres persones que liegen aguest article enquiath finau son era pròva evidenta que cada viatge mès gent ei desconectada de tot aguest postureo. Auetz sentut bèra autocritica? Cap! tot s’a hèt ben. Quin error!

Poderíen guardar eth mediterrani, per exemple, e es mils de persones que morissen sajant d’arribar a Euròpa, marchant des guerres, e qu’es Estats Europèus non les vòlen deishar entrar. E perquè non dèishen? Donques, perque representen ua amenaça. Açò ei proteccionisme o non? Ei nacionalisme o non?

Aumens, eth Foro Mondiau de Davos mos pòt servir entà saber çò que vòlen hèr, e anticipar-mos as sues conseqüéncies. Sonque atau mos poderam protegir entre nosati.