ACCIONAR O REACCIONAR
VIA (aranesa)
![VIA (aranesa)](https://imagenes.segre.com/files/image_large/uploads/2023/09/06/64f8c801500f7.jpeg)
VIA (aranesa)
Valors, Idèies e Actituds auríen d’èster ath delà de tres paraules significantes, er encastre d’accion de tota persona enes sues accions en àmbit polític. Imaginetz un projècte polític en quau era accion que se pòrte a tèrme ei basada en ua escala de Valors, en un programa d’Idèies e ua coheréncia d’Actituds. Aguesta forma de hèr politica a d’èster perfectament imaginable e a d’èster ua exigéncia irrenonciable. Ara imaginetz ua societat responsabla tamb eth deman peth dessús der auè e ua forma d’actuar (dera societat) en benefici deth conjunt peth dessús deth benefici personau. Aguesta forma de hèr dera societat a d’èster perfectament imaginable e a d’èster ua exigéncia irrenonciable. Sò conscient qu’er idealisme polític non ei un camín reau. Sò conscient qu’eth realisme polític non ei un camín guanhador. Per tant, eth panorama actuau ei: ne idealista, ne realista. Quin desastre! N’extrèigui donques ua conclosion: “Ena actualitat un guanhador (en politica) s’encastre en ua persona que guanhe eth poder entà dar respòsta ar auè tamb ua gestion exitosa e personalitzada dera oportunitat que meritòriament a artenhut”. I a excepcions, sortosament.
Hè cent ans, es sufragistes deth Regne Unit artenhèren eth Dret a Vòt dera hemna. Un Dret que reclamèren tamb pannèus que didien: “Deeds Not Words”, ei a díder, “Hèts e non paraules”. Siguec eth precedent entàs democràcies que venguèren dempús. Se mos autoexigim coma colectivitat melhorar era societat que viuem, ac artenharam. Se mos autoexigim dessenhar eth futur l’auram, senon auram çò qu’auem. E çò de pitjor, non auram projècte de futur.
Desiri ua politica postmodèrna aranesista tamb Valors, Idèies e Actituds en benefici de toti es que viuem e trebalham en Aran, tamb igualtat e equitat, per auè e tanben peth deman.