Wi fi 6

Entar an que ben ei prevista era metuda en foncionament dera wifi 6 (coneishuda tecnicament coma 802.11ax). Rebrembem qu’enquiara auem era wi fi 4 (802.11n) e era wi fi 5 (802.11ac).

Era naua tecnologia wi fi permeterà auer ua major velocitat de transmission de dades, melhorarà enquià un 40% era wi fi 5, tostemp e quan s’utilitzen routers ideonèus entara prestacion deth servici. Serà mès eficienta en consum d’energia mejançant ua tecnologia smart. Entar usuari aguest menor consum d’energia permeterà qu’era bateria deth dispositiu conectat sigue melhor gestionada e per tant evite un consum non de besonh.

Paralellament, en indrets de major satuacion d’us de conexions permeterà ua melhor gestion e distribocion dera madeisha e aquerò comportarà poder conectar mès dispositius ath viatje e sustot, objectes inteligents.

Aguesta naua tecnologia amassa tamb er inici dera tecnologia 5G prevista entar an 2020 aufriràn un saut de qualitat en conexion impressionant, tant en nombre des que permeterà absorbir coma ena qualitat.

Mès rapidesa, mès conexions, menor saturacion, mès objectes conectats, mès dispositius tamb connectivitat, mès e melhors servicis e fòrça mès ventatges qu’en Aran auríem de començar a plaçar ath dessús de plans estrategics entara melhora dera nòsta aufèrta de servicis públics e torístics.

Poderíe èster un bon moment, utilitzant er impuls dera tecnologia disruptiva entà plantejar quin model de País volem, quin model torístic sostenible sajam d’arténher e quini projèctes plaçam ath dessús dera taula entà crear oportunitats entara joenessa. Desiri un País en qu’eth talent dera joenessa que va a estudiar dehòra retorne. Desiri un País que es sòns servicis públics siguen pionèrs e es melhors, non poderam sauvar es quilometres tamb es grans ciutats mès tamb era tecnologia podem sauvar es distàncies.