Eth “Debat d'Aran”

En Aran s’està produïnt un fenòmen reaument interessant. Naues comunitats, autoconstituïdes pera proximitat d’interessi des sòns integrants, estàn debatent e creant idies e prepauses en benefici dera colectivitat.

Non gessen ena premsa, non se publiquen enes hilats sociaus, inclús, non en parlen mès enlà d’aguesti Foros de Comunitat, mès s’estàn creant e produïnt. S’està innovant des dera pròpia societat aranesa e s’està hènt d’ua manera ordenada, propositiva e constructiva.

Enes debats que jo e pogut èster present, que dejà son fòrça, me’n pòrti ua agradiua sorpresa e sustot un coneishement mès aprohondit des debilitats e des amaneces que à era societat aranesa (parlen era lengua que parlen, agen neishut a on agen neishut e se senten coma se senten).

Que Aran ei un País “diferent”, dera resta, ac sabíem mès, enquiara, ac encastraua enes elements tangibles (drapèu, lengua, istòria, personalitat,sentiment nacionau, geografia, clima, eca) que mos permeten visualitzar aguesta diferéncia. Ara, tanben, ac constati ena configuracion, organitzacion, escala de valors e manèra de hèr que s’aluènhe d’aquerò que èrem acostumadi e, tanben, dera “individualitzacion” qu’eth mon està definint.

Ei possible que quauques d’aguestes naues comunitats, beth dia, siguen cridades a èster agents de referéncia ena constroccion de País. Ei imprescindible integrar toti aguesti elements e comunitats e crear es canaus d’expression e participacion qu’ac artenhen. Lèu començarà “eth debat d’Aran”, l’auem dessenhat e premanit entà arribar a totes es comunitats e persones que viuen e trebalhen en Aran, dubèrt e constructiu deth futur “individuau” e “collectiu”.