Tamb actitud

Quan èm dejà en ua “patentada” desacceleracion economica a nivèu globau, fòrça gent encara se trape en “aqueri tempsi…”, en tot demorar que tornen. Quan fòrça indicadors macroeconomics apunten a ua possible recesion a nivèu globau enes pròplèus mesi, fòrça gent encara se trape a principis d’aguest milèni. Aguestes persones se seiràn entà veder-les vier. Ara resta auè torni a demanar-vos ua actitud propositiva entà hèr frònt ad aguesta naua situacion macroeconomica.

Entà implementar-la cau era complicitat de toti es agents economics, sociaus, empresariaus e naturaus possibles. Açò meritarie d’auer un lideratge, en parlarè un aute dia, qu’ac hèsse possible. Mentres des d’aguest espaci, tamb era volentat de somar, lanci ua prepausa; era creacion d’un Indèx Socio-Economic Aranès.

Un Indèx que recuelhe dades (economiques, empresariaus, sociaus, de salut, demografiques, governamentaus, eca), les analitze e en hèsque analisis reaus a cuert, miei e long tèrme. Un ensenhador que sigue capaç de mostrar-mos er “estat” en que se trape Aran a toti es nivèus, non sonque economics, tanben eth benestant. Un Indèx que mos permete articular politiques publico-privades fonamentades a long tèrme que non se basen ena intuicion e non siguen sotmeses a volentats interessades, tant sigue a nivèu polític coma economic. Un Indèx que permete ara ciutadania empréner naues oportunitats e, ath País, captar e retièr talent. Tostemp en paraigües des grani desafiaments qu’auem coma persones, coma societat e coma territòri.

Per méter quauque exemple: en poderie gésser inclús era creacion d’ua patronau exclusiua aranesa, vitau entar empresariat d’Aran, e/o un sindicalisme exclusiu aranès, fòrça interessant entara luita pes drets laboraus e era conciliacion familiar e laborau adaptat ara Val d’Aran e as naues realitats. Somam?