“Peix al cove”

En sò segur qu’enes darrèrs ans era dita “peix al cove” ei des que mès demore ena retina des uelhs entà simplificar actituds, prepauses e dialectica politica. Aguesta s’utilitze entà qu’es detractors d’un possible acòrd en ua negociacion, poguen simplificar, minimitzar e reventar es arguments a uelhs dera gent. Aguesta frasa ei un exemple dera simplicitat, e inclús m’atreveria a díder dera mediocritat, a on a arribat era politica auè en dia.

Mentre quauqu’uns mòstren desacomplexadament aguest mediocritat, era grana majoria de persones son a favor de trapar ua solocion política a un conflicte polític istoric, sensible, enorme e fòrça complexe, eth mès difícil des dera transicion. Se èm consequents ad aguesta volentat de trapar solocion politica èm conscients que cau ua negociacion e qu’aguesta comportarà que toti guanhen e toti perden. Per tant, assomim que negociar vò díder arribar a un punt d’acòrd en que cadua des parts se pòden sentir satisfetes sense auè’c artenhut tot.

Arribe donques era contradiccion que dèishe ath descubèrt eth reduccionisme intelectuau existent e qu’ei utilitzat pera tirania e es extremistes entà destruï’c tot e promulgar es sòns hiperlideratges.

Aguesta dita catalana, istoricament encastrada entà destruïr eth Pujolisme e de retruc a ua forma de hèr politica, ei verbalitzada intencionadament per interès personau e/o partidista. Atau ei coma eth talent e era politica s’aluenhen d’aquerò que volem toti e totes. En compdes de tanta simplicitat e reduccionisme sò que cau ei tornar a hèr politica. Serà sonque atau coma s’artenharà méter er interès generau e era ciéncia politica ath deuant de tant reduccionisme intelectuau.