Oportunitat

Hè pògues setmanes en aguest madeish espaci hí “ua suplica entà Aran”, en tot cridar a deishar de banda elements superficiaus e començar, toti amassa, a trebalhar entà hèr frònt ara “naua normalitat”.

En tot hèr un repàs setmanes dempús d’aqueth escrit, es institocions araneses (Conselh Generau d’Aran e Ajuntaments) an plantejat mesures fòrça disparières. Eth Conselh a iniciat un procès de participacion nomentat Aran 2030 (entre accions diuerses d’ajuda), er Ajuntament de Naut Aran a plantejat, dejà fòrça d’eres en execucion, tanben un conjunt d’accions. Era resta d’ Ajuntaments an aprovat mès, per terminis, non s’an pogut vèir realitzades. Totes aguestes accions governamentaus van dirigides a minimitzar es efectes negatius qu’era pandèmia dejà provòque ena economia familiar deth País.

Mès, en tot hèr ua guardada longa, ei eth moment de plantejar estrategies a long tèrme que s’encaminen a hèr d’Aran un país d’oportunitats. Eth mon laborau, era transformacion digitau e es patrons de consum provocaran canvis disruptius qu’auem de saber hèr frònt entà non demorar darrèr.

Èm obligadi a ambicionar eth lideratge sociau, economic e productiu de futur en un espaci de talent e oportunitats. Entà artenhé’c ei imprescindible qu’es institocions araneses, e partits polítics, conviden a professionaus e experts d’Aran, que viuen en País e dehòra, a implicar-se en sò qu’en diden era reconstoccion, e aguesti trebalhar luenh d’interessi partidistes e immoraus.