Major Trapero

Hè tres setmanes era Audiéncia Nacional dictec senténcia pes hèts relacionadi tamb er un d’octobre ena acusacion que queiguie sus eth Major Trapero, era Intendent Laplana e nauti cargues deth departament d’Interior.

Era senténcia siguec absolutòria entà toti es encausats, sò que provoquèc ua lum de justícia ath deuant de tant de dolor entà tantes e tantes families e victimes. Era senténcia, ath marge de absolucion as encausadi, plasmec en elements provatòris ua gestion deth prumèr d’octobre exemplar per part deth còs de Mossos d’Esquadra.

Des linhes dictades ena senténcia se deduís qu’era actuacion des Mossos siguec proporcionada e, sustot, nautament responsable deuant dera multitud e emotivitat d’aquera jornada. Aguesta senténcia marque un relat de coma s’an de gestionar es policies en sègle present.

Atau madeish, aguesta senténcia e coma efecte colaterau dèishe en entredit era preson der alavetz Conselhèr d’Interior Forn e dera resta de membres deth govèrn qu’auè son privats de libertat justa.

Auè, eth Major Trapero demore restituit coma cap deth còs de Mossos d’Esquadra e tornarà a recuperar era linha que permetec amplir-mos d’orgolh pera gestion des atemptats perpetradi en Barcelona en aqueth madeish an. Auè eth Major Trapero retorne, tamb examen de consciéncia personau, a ua normalitat ena quau Catalonha aurà de tornar entà tornar a recuperar era sua escala de valors e era convivéncia exemplar que mos caracteritza coma pòble.