Inflacion transitòria?

Agèr se dec a conéisher er ensenhador dera inflacion en conjunt der estat, dejà a arribat ath 5,4% interannau. En tot territorialitzar aguesta dada macroeconomica, aguest madeish diari publicaue qu’en conjunt des Terres de Lleida e deth Pirinèu era inflacion arribe ath 6,2% ena madeisha escala estadistica. Hè uns mesi, via Twitter, publicaua qu’ua amenaça planejaue ath dessús dera nòsta economia, era familiar, era estanflacion –aguesta se produsís per un increment dera inflacion e un estancament dera economia–.

Era luita entà lheuar economicament un territòri que patís ua estanflacion ei fòrça complèxa, entre d’auti motius perqué es mesures a aplicar se contradissen entre es variables macro que la provòquen.Mès, era suspresa mos la trapam enes organismes de governança globau (BCE, FED, FMI) qu’en cadún des informes macroeconomics que publiquen periodicament, pivòten era inflacion en ua transitorietat. Hè mesi que hèm en un creishement dera inflacion que cada viatge ei mès evident, era repercusion der increment des còsti dera matèria prima encara non an arribat ena sua totalitat, es prètzi de producte bàsics son en creishement e tantes variables mès. Per auta banda, hè pògui dies era Comission Europèa redusic era prevision de creishement der estat de manèra significativa.

Aguestes donades mos diboishen ua situacion ena quau recomani prudéncia consumista, prevision d’estauvi e er exercici dera crompa inteligent.Era inflacion ei er impòst indirecte mès sauvatge que i a, er impòst qu’empraubís ara ciutadania, met en crisi ath sistèma empresariau e paralitze eth sistèma econòmic.