Futur d'internet

Era Comission Europèa, es Estats Units, eth Regne Unit e d’auti paisi deth mon, enquià un totau de sishanta, an aprovat era Declaracion deth futur d’Internet. Eth conjunt des paisi signataris d’aguest declaracion lheuen a oficiau era volentat qu’er Hilat de hilats de connexion sigue dubèrt, de franc, globau, interoperable, confidable e segur, tanben rafirmen eth sòn compromís entà protegir e respectar es drets umans en linha e en tot eth mon digitau.Compartissen, diden, era creença qu’Internet à d’operar d’ua manera descentralitzada, a on es tecnologies digitaus s’utilitzen de manera confidable, en tot esvitar era discriminacion injusta entre individus e permeten era competéncia des plataformes en linha e era competéncia leau entre empreses.Eth posicionament establert ena nomentada declaracion non dèishe d’éster sorprenent se non siguesse qu’èm conscients qu’eth papèr ac cuelh tot. Era realitat mos demòstre qu’ei sorprenent qu’institocions de governança globau quan hè mès de quinze ans qu’internet ei un actor principau ena economia mondiau se posicione auè de manèra oficiau.

Què i a darrèr d’aguesta declaracion? Me permeti méter ath dessús dera taula qu’existís era realitat, auè assomida a trauèrs d’aguesta declaracion, qu’era tecnologia connectada ei un agent qu’à pres era sua pròpia libertat e a empoderat as persones e comunetats mès enlà des figures oficiaus que tamb aguesta declaracion hènt un prec e demanen cleméncia.Mès, serà fòrça interessant sauvar aguesta declaracion entà poder sustentar aguesta volentat escrita non vinculanta as normes regulatòries que demoren per vièr enes pròplèus ans, principaument eth MICA. Me prenaré era responsabilitat de hèr-ne ua valoracion quan se donguen es escenaris que lèu poderam vèir en directe.