Darrèr ostiu

Hè pògui dies poguí liéger ua entrevista que li hèren a Santiago Niño-Becerra, economista que preveiguec era crisi financèra d’aguest mileni, ena qu’eth titolar ère “eth darrèr ostiu”. Mès enlà deth titolar dera noticia, tamb tò dramatic e finalista, aguesta afirmacion la sustente en un analisi macroeconomic fòrça simple. Vengui a resumir dera següenta manèr; se puje era inflacion (ensenhador de creishement de prètzi generaus) e perilhosament tanben puje eth subjacent (prètzi de matèries e productes prumèrs dera lar) i a ua dirècta repercusion en ua disminucion deth poder adquisitiu des persones, a talh d’exemple podem vèir: era energia (gas e electricitat), eth petròli (combustible), matèries prumères (bàsics dera cistalha dera crompa).

Se ad aguesta realitat li iges un non increment des salaris adaptats ar increment deth còst dera vida (devaluacion salariau) ei evidenta era prumèra afirmacion. Era dusau des afirmacions vire ath torn des compdes der estat, un menor poder adquisitiu repercutís directament en ua menor recaudacion dera riquesa, per tant ua conseqüéncia dirècta enes compdes públics que s’auràn d’ajustar a ua menor recaudacion. E era tresau evidéncia respon ar increment deth prètz deth diner (interés) situacion qu’ar Estat Espanhòu e as sues economies locaus les portarà a un increment exponenciau des diners que se veiràn destinadi a pagar aguest interès.

Açò repercutís directament enes plans de governabilitat e pressupostaris en tot non poder esvitar retalhades, li en diràn d’ua auta manèra.S’aprohondim un shinhau mès en deute públic, auram de vèir coma place er estat eth sòn deute, qu’enes darrèrs ans a estat eth Banc Central Europèu qui la’c à crompat. Situacion qu’à partir de seteme ja non se produsirà. Entà fòrça gent, pòt èster eth sòn darrèr ostiu.