27 grads

Eth govèrn der Estat Espanhòu a decidit qu’a partir d’ara coma mesura d’estauvi energetic es centres de trebalh an d’èster a 27 grads. Aguesta mesura ben dada, segontes justifiquen, peth compromís der Estat tamb era Union Europèa entà redusir eth consum energetic dat que Russia pòt talhar eth suministrament de gas a païsi dera Union Europèa e aquerò mos poderie portar a un colapse energetic tamb consequéncies catastrofiques. Ei a díder, er Estat a decidit qu’ei era ciutadania qui s’a de tornar a sacrificar deuant d’ua situacion qu’eri en diden sobrevenguda.Mès, de vertat ei ua situacion sobrevenguda? De vertat era dependéncia d’Euròpa tamb Russia ei sobrevenguda? De vertat arres podie previer qu’arribarie un punt coma eth qu’estam viuent? De vertat a d’èster era ciutadania qui torne a pagar es consequéncies d’ua nefasta gestion energetica en Estat? Quan mos arribec era pandèmia non èrem premanits, quan arribe un conflicte geopolític internacionau non èm premanidi, quan era tecnologia mos obligue a adaptar-mos non em premanidi, quan eth canvi climàtic mos tòque d’apròp non èm premanidi, quan era inflacion puje non èm premanidi, quan eth BCE decidís non crompar deute espanhòu non èm premanidi… era pregunta que mos cau hèr donques ei, auem de vertat ua classa politica premanida? Era respòsta la dèishi a cadun des lectors.A 27 grads non se poderà trebalhar, es establiments que non agen dispositius de sensoritzacion non poderan hèr era inversion.

M’agradarà vèir s’aguesta obligatorietat se complís en Congrès des Deputats, enes institocions publiques der Estat e enes dependéncies administratives. Segurament coma non s’an adaptat hauràn ua excusa que toti poderam préner coma nòsta.