Un nau cors

Comence un nau cors escolar, sense mesures de seguretat despús des corsi mercats pes protocòls dera COVID. Despús de dus mesi de vacances plies d’activitats, sense oraris, ara tornam ar orari pautat, tà grani e petiti. Tornam tamb premisses a subergésser: era non aplicacion des percentatges en ensenhament des lengües, permeterà trabalhar en un modèl educatiu integrador, es escolans acabaràn era escolarizacion estant competents enes tres lengües oficiaus en Catalonha: aranés, catalan e castelhan.

E era non aparicion ena Lei deth 9 de junh de qu’er aranés ei lengua veïculara enes centres educatius d’Aran, encara qu’era Lei d’Educacion de Catalunya e era Lei der occitan, aranés en Aran ac amparen, mès aquerò que non quede escrit tamb eth temps pòt auer conseqüéncies.Tornam tamb mès professorat, donades istoriques. Un professorat qu’a agut de hèr “magia” entà poder començar. Mès coma tostemp, premanits e endauant!Tornam tamb ua ràtio inferiora en P3, e coma nauetat era gratuïtat entara escolarizacion de P2.

Un prumèr pas entà hec extensiu ena etapa 0-3, segontes paraules deth President dera Generalitat. Tanben a baishat eth nombre d’escolans de prumèr dera ESO, que permet redusir-ne era ràtio.Tornam aguest mes de seteme, tamb es tardes liures, mès es escolans i pòden èster enquiàs 16,30 ores tamb activitats de léser educatiu, s’an nomentat monitors tad aguestes ores, e eth professorat pòt aprofitar tà premanir materiau o amassades.Tornam tamb ua inflaccion superiora, associacions de consumidors coma er OCU ja alèrten que pòt èster ua des mès cares des darrèrs ans. E coma nauetats: era incorporacion de naui curriculums que s’aplicaràn a long de tres ans, mens en bachelierat qu’ac haràn enguan, tamb er objectiu de qu’es escolans artenhen un esperit mès critic e que sigen capables de resòlver problèmes reaus.Bon trabalh.