Era hèira

Aguesta setmana s’an celebrat es hèires ena Val d’Aran e aué 8 d’octobre, de ben segur, seram dant torns pes carrèrs deth centre de Vielha, ei era hèira! Ua hèira centenària. Es carrèrs principaus son plens de parades de ròba, de minjar, de guinhauets, de doci, de joguets,… Es hèires son eveniments tamb ua longa tradicion, qu’èren capables de reactivar era economia deth parçan. Ei ena tardor pr’amor que coïncidie tamb era baishada des ramats dera montanha.

Un concèpte de hèsta restacat tamb era activitat comerciau.La rebrembi de mainada coma ua grana hèsta, prumèr peth maitin, benlèu, ja mos desvelhauen es esqueres deth bestiar quan baishauen peth carrèr entà portar-les tath recinte firau. Sajauen de vener-les, fòrça d’eri ja auien hèt tractes tamb es gasolans, principaument valencians, que pendent era setmana passauen pes bòrdes tà veder-les. Aué, sonque se celèbre un Concors de bestiar en tot premiar oelhes, crabes e shivaus, tanben se liure un incentiu d’assisténcia as pagesi participants.Despús eth dinar familhar, tà qu’en auer acabat, tornar a dar torns pes carrèrs.

A mesure que passeges, te vas trapant tamb era gent deth Naut Aran o deth Baish Aran que hè temps que non vedies, bon dia!, com va! adishatz! Era defunta escrivana aranesa, Pepita Caubet, ac descriu perfèctament ena sua òbra: “Era hèira darrèra de Vielha”.Rebrembi tanben eth guirlache e eth torron qu’ère abituau crompar. E dempús eth balh enes cubèrts, un balh fòrça animat, a on es qu’auien venut quauque bestiar èren plan contenti!Aué a darrèra ora, anaram cargats de bosses tamb bèth parelh de michons, tamb bèth pijama o bèra hilada d’alhs e, a demorar enquiar an que ven!