Cultura de patz

Ara qu’arribe Nadau, uns dies de desir de boni auguris tà toti, de trobades familhars, d’amics, celebracion d’ua bona naua, poiríem dedicar, cada un, ues menutes a pensar enes lòcs que i a guèrra, conflictes. Mès tanben a nivèu de toti es ciutadans deth mon, auríem d’èster promotors d’ua convivéncia pacifica, d’un respècte ara pluralitat, d’ua educacion en valors e drets umans, d’ua cooperacion solidària internacionau e sustot cercar era patz en mon. Resòlver es conflictes de manèra positiua, creatiua e non violenta.

Era seguretat mondiau s’a deteriorat, era despena militar ei era mès nauta dera istòria, que repercutís enes recorsi entara educacion o era salut, diden que tamb un 2% d’aguesta despena serie possible eliminar era hame en tota era tèrra. Ei possible revertir es situacions de violéncia en favor d’una cultura de patz? S’era societat civila ei capabla d’impulsar politiques e accions entara patz, dilhèu es causes poirien cambiar. Pas a pas, eth procès pòt èster long, se pòden guanhar rèptes enormes, coma auem podut comprovar ath long dera istòria.

Sonque damb ua petita part des recorsi que se destinen tara investigacion e era premanida dera guèrra, de ben segur daríem passi gigantins entà un mòn en patz.Ath delà dera complexitat deth moment, conflicte en Ucraïna e tanben cau pensar que n’i a mès d’ua trentia de conflictes en mon que castiguen sustot ara societat civila tamb mòrts, destruccion e desplaçaments, fòrça d’eri invisibles o silenciats pes mieis. Aprofitem entà cercar airines tà arténher ues condicions de vida dignes entà toti e en sòn lòc d’origina. Era violéncia, en totes es sues cares, ei eth darrèr recors entà qui non sap pas com apariar ua situacion!.