MOTS
De celebracion!
![De celebracion!](https://imagenes.segre.com/files/image_large/uploads/2023/09/10/64fd671c9617b.jpeg)
De celebracion!
Enguan an 2023, vam a celebrar es 50 ans dera Fondacion Privada Musèu Etnologic dera Val d’Aran, que neishie eth dia 15 de mai de 1973 tamb era finalitat de promòir tota sòrta de manifestacions dera cultura e dera lengua d’Aran e sauvar eth sòn patrimòni artistic e documentau. Gràcies ara vision deth prumèr president sr. Miquel Farré que desirèc cooperar ena labor de sauvament des valors artistics, istorics e culturaus dera Val d’Aran, preocupat coma ère pera dispersion des objèctes d’un cèrt interès.
Ath madeish temps, amassa tamb d’auti patrons, aueren era bona escadença d’aquerir un istoric e nòble edifici: Casa Santesmases, torn deth generau Martinhon coma sedença dera Fondacion, que mès tard s’i creèc eth Musèu dera Val d’Aran. 50 ans comprometuts tamb era societat aranesa e atau ac demòstren es diferentes activitats amiades a tèrme. Ua des sues seccions Amics de Montgarri, tanben començaue a caminar en an 1973, chagrinats per estat dera glèisa, rectoria e entorns deth Santuari de Montgarri, en tot començar en aqueth madeish an pera recuperacion deth tet dera glèisa que se trapaue en estat roïnós.
An darrèr an, an anat apraiant tot eth conjunt e qu’aué en dia gaudim d’aguest paratge espectacular.Qui tanben celèbre es 50 ans ei era Còlha de Santa Maria de Mijaran, que neishie eth dia 8 de seteme de 1973, ei a díder que baraue per prumèr còp eth dia dera Mare de Diu de Vielha. Ath long d’aguesti ans, an passat pera Còlha nombrosi joeni e joenes interessats per mantier eth folclòre aranés. Toti eri premanissen diferentes accions tà celebrar tamb tota era societat aranesa.
Hestejament que plan se meriten peth sòn trabalh ath long d’aguesti 50 ans. Felicitats!!!