Ei terrible!

Aué voi dedicar es mies paraules tà tota aquera gent qu’a patit eth tèrratrem de Turquia e Siria eth passat 6 de hereuèr de maitiada, dormint toti eri, e qu’es imatges qu’auem podut veir, mos dèishen eth còr sarrat. Passen des 40.000 mòrts e eth nombre contunhe creishent, segontes era ONU se poirie doblar aguesta chifra, pr’amor que i a fòrça gent atrapada enes edificis enfonsats. Era setmana passada encara poderen rescatar a persones viues.

Enquia ara es ahèrs de rescat an estat malaisits, pr’amor que non podien auançar, ac auien de hèr pòc a pòc e escotant se sentien a bèth suberviuent. Ara ja i son es maquines e se va mès rapid en trèir eth tarcum. Un aute factor qu’a influït ena dificultat deth rescat an estat es baishes temperatures, atau ac an dit e volontaris que i an anat.Com pòt èster que non revisèssen es materiaus de construccion d’aguestes bastisses qu’ara son en tèrra e òc, ara es autoritats turques detien constructors en tot investigar era inseguretat des edificis, massa tard non!E en nord-èst de Siria encara pitjor e ath delà era ajuda umanitària detenguda ena termièra.

Sonque mancaue açò despús de 10 ans que sobreviuen ara guèrra e a on ja i auie un pialèr de gent que depenie dera ajuda.Per çò que diden es ONGs que son sus eth terren, recomanen hèr aportacions economiques abans de donacions materiaus, que tanben arribaràn. Milèrs de persones s’an quedat sense larèr e en plen iuèrn, viuen en campaments, refugis d’emergéncia, o enes carrèrs, enes coches; toti eri an de de besonh d’aigua, supòrt alimentari, materiau igiènic e medicau e a mès long tèrme era reabilitacion e reconstruccion. Pensi tanben enes espitaus, era imatge deu èster terribla!