Era lectura

Aguesta dimenjada vam a celebrar ua auta diada de Sant Jòrdi, ei un dia plan magic e plen de lum, pr’amor que traparam estands de ròses, que de cada còp les podem crompar de diferenti colors non sonque era vermelha, e de libres a on s’auferissen es darrères publicacions, sustot.Ei un bon moment entà començar era lectura d’un libre e lectura en aranés se pòt èster! cada an auem bèra nauetat e se non enes bibliotèques ne traparatz. Ara qu’es naues tecnologies invadissen es nòstes vides, era televison, es ordinadors e es telefons intelligents son plan presents, mos aucupen plan ores ath long deth dia, açò hèr que mos còste trobar estones entà liéger.Enes infants cau qu’era lectura forme part des sues abitudes, pr’amor que s’a demostrat que i a ua relacion dirècta entre er abit lector e er exit escolar, es mainatges/mainades que son boni lectors an uns boni resultats academics, mielhore eth sòn vocabulari e ajude ena ortografia e redaccion.Quan artenhem un libre que mos absorbís ei un plaser passar bèra ora somiant tamb aquerò que descobrim en libre. Liéger fomente er interès per conéisher, dar era oportunitat de parlar sus aquerò que i passe e crear judicis e motius de convèrsa, podem evadir-mos des problèmes, auer ua ment mès dubèrta ath mon que mos entornege, conéisher d’autes manères de pensar e d’èster, per tant acceptar era diferéncia, major capacitat critica, desvelhe interèssi e aficions naui, en definitiua liéger ei ua forma de léser saludable que te transpòrte luenh.

A trauès des planes des libres podem víuer aquerò que jamès auessem podut imaginar. I a libres que te deishen peada, son terapeutics. Liegem!!!