Santa Quitèria

Deman eth pòble de Vielha celèbre eth sòn romieuatge en Santa Quitèria, ena boca sud deth Tunèl de Vielha. Ei ua mair de Diu martir deth sègle V, era sua festivitat ei eth dia 22 de mai. Ei invocada contra era ràbia.

Era capèla ei deth sègle XII e forme part deth patrimòni der Espitau de Sant Nicolau des Pontells. Se bastic tamb era finalitat de contrarotlar eth transit des dus costats deth pòrt de Vielha. Ei ua tradicion que ven de luenh, coma fòrça d’autes que se celèbren enes diferents pòbles d’Aran.

Er Espitau de Sant Nicolau des Pontells siguec un refugi de montanha pendent fòrça ans. Erigit pendent era Edat Mieja per monges dera orde des templaris. Siguec Pere eth Catolic qui dotèc d’Espitau ara aubèrja a on i auie un espitalèr.

Tradicionauemt se hège eth pelegrinatge a trauès deth Pòrt de Vielha, actuaument encara i a valents e valentes qu’ac hèn. Se repartís era caritat deth pan e er hormatge e se benedís eth tèrme as quate punts cardinaus. Ena Val d’Aran ei costum enes romieuatges repartir era caritat.

Encara rebrembi es grops de familhes despartides pes prats un shinhau mès tà baish dera capèla, amassades tà dinar en bona armonia e gaudint deth lòc. Er Ajuntament repartie ua ampolha de vin de Champanha a totes es familhes e a mieja tarde tath balh, aquiu demoraue bèth music qu’ac tocau tot. I arribauen tanben pelegrins dera Alta Ribagorça catalana e aragonesa, i a agut tostemp bona relacion tamb aguesti pòbles vesins.

Ei de felicitacion veir coma es aranesi e araneses an volut mantier aguestes costums plan antiques, encara qu’ara sigue tamb d’autes expressions ludiques. Conservem-les e avalorem-les aguestes tradicions en tot transmetent-les a generacions a vier!