Lengua Viua

Deman eth collectiu Lengua Viua torne a organizar era 29 au. Corsa Aran per sa lengua, jornada que reivindique er usatge, sustot, sociau der aranés, era lengua d’aguet petit territòri. Coma cada an, es participants comencen a caminar peth maitin, en tot gésser tàs 11:30 ores de Les e de Montgarri e a mesura que passen pes diuèrsi pòbles d’Aran se i higen d’auti caminaires.

Mès tanben i a era gessuda deth Pòrt de Vielha qu’ei liura pr’amor des sues caracteristiques, un pòrt de montanha. Toti eri pòrten elements identificatius dera corsa: ua samarreta plan atrasenta e drapèus d’Aran, mès tanben es sies terçons corresponents qu’un còp ena plaça se monte un puzze en tot formar era mapa d’Aran e ua clau tàs tres tèstes dera corsa. Aguesta represente eth lèma der escrivan occitan Frederic Mistral: qui ten era lengua, ten era clau… Tath torn de mieja tarde s’arribe ena Plaça d’Aran en Vielha entà hestejar toti amassa, petiti, joeni e grani, qu’er aranés non se tòque e ath torn deth monument ara lengua, dançam ath son dera musica deth grop occitan Nadau.Era situacion der aranés ei delicada aué per aué, per aquerò mès que jamès, auem de besonh d’ua jornada coma aguesta, entà conscienciar ara poblacion d’Aran a tier-la, a auer un respècte per era, lengua tenguda pes trobadors e trobairitz, que s’a mantengut ath long des ans , des deth sègle XI, ath delà des influéncies des autes lengües.Ei ua caracteristica pròpria nòsta e per açò tanben auem un govèrn diferent ara rèsta deth territòri de Catalunya, ei un Conselh Generau.

Èm nosati e nosates es que mos cau persutar tà qu’er emplec der aranés sigue de cada còp mès viu. Ei ua lengua oficiau en tota Catalunya!