Amics de Montgarri

Dimenge passat celebrèrem es 50 ans des Amics de Montgarri. Ei ua associacion d’amics que s’amassen entara recuperacion dera glèisa de Montgarri, era rectoria e eth sòn entorn. En an 1973 un 2 de junhsèga pendent eth romieuatge, dus gojats vederen qu’en tet i auie un bon horat, aguest siguec eth causant de tot, pr’amor que decidiren qu’ac calie apraiar abans de que se maumeter-se eth Santuari dera Mair de Diu de Montgarri.

Bastissa deth sègle XVI construïda sus ua capèla deth sègle XII. Comencèren a recuélher sòs enes pòbles de Pujòlo e d’Arties e Garòs, mès non n’i auec pro e gràcies ara implicacion des rectors des parròquies e deth Bisbat d’Urgell artenheren hèr front ada aqueres prumères despenes dera predita reparacion. De despús an agut eth supòrt economic de fòrça particulars e entitats deth país e de dehòra.Ath long d’aguesti ans, pòc a pòc, s’a anat restaurant tot eth complèxe, Santuari e Refugi, tà qu’ara pogam gaudir d’aguest lòc tant emblematic, fòrça visitat e lòc de pas entre Aran e Pallars.

Se trape a 1645 mètres e plaçat en Naut Aran. Eth refugi de montanha junh es refugis francesi tamb es des Pirenèus.Anticament i auie un pòble, ara sonque podem veir es rèstes de bèra bòrda, mès que siguec abandonat pendent es ans seishanta, pr’amor des condicions de vida, aluenhat de d’auti pòbles e sustot pes fòrtes nheuades en iuèrn, qu’ara a recuperat vida gràcies ath torisme autant en iuèrn coma en estiu.Cau arregraïr era vision qu’aueren aqueri dus gojats hè 50 ans, pr’amor qu’auem recuperat un endret capdau deth nòste patrimòni religiós, culturau e paisagistic. Fòrça felicitats Amics de Montgarri!