Eth teletrabalh

Pr’amor dera Covid, eth govèrn aprovèc era prumèra Lei de teletrabalh, un nau sistèma de trabalh, qu’encara que ja se practicaue a menor escala, aué a vengut entà quedar-se. Arraïtz d’açò a gessut tota ua normatiua: decrèts, reiaus decrèts, resolucions, instruccions, normes, etc. entà regular tot aguest metòde de cambi autant ena administracion publica coma ena empresa privada.Eth teletrabalh a d’èster pactat entre eth trabalhador e era empresa, s’a de signar un acòrd a on constaràn es oraris, eth materiau de besonh tant d’equips coma d’airines, despenes, quin percentatge de teletrabalh e quin de presenciau, en fin ua auta manèra de trabalhar qu’a estat possible gràcies ara introduccion des naues tecnologies, sustot des mieis informatics que permeten ua bona comunicacion e de forma luenhana. Sonque ei de besonh un PC, internet, un mobil e ua camerà digitau entà començar a trabalhar, non cau ne ua taula, se pòt trabalhar inclús anant en bus, en trèn o en avion e en quinsevolh moment.Causa qu’a permetut ua conciliacion familhar, abans sonque podíem demanar ua reduccion de jornada. Segontes er INE (Institut Nacionau d’Estadistica) eth grop d’edat que mès ac demane son es de 35 a 44 ans, grop que coïncidís tamb es persones que comencen a formar ua familha e tamb hilhs a cuedar. Eth hèt de non auer-se de desplaçar tath lòc de trabalh a on se i demore era màger part deth dia, aufrís ath trabalhador mès temps entà èster tamb era sua familha. Diden qu’era possibilitat d’organizar-se er orari des de casa e un còp solucionats es imprevistis familhars, se tradusís en ua major productivitat pr’amor qu’es ores de trabalh seràn entà auançar en ahèr!