Naues tecnologies

Es naues tecnologies an artenhut un papèr plan important ena vida de toti, mès tanben mos pòrten mau de caps!. Hè uns dies que tornam a sénter enes mieis de comunicacion er emplec d’aguestes enes aules des collègis. Era escòla non a estat ath marge, senon que des deth prumèr moment i a apostat per introdusir-les: ordinadors, tauletes, projectors, pantalhes tactils e mobils entre d’autes. Ara despús d’uns ans ja tenguts coma abituaus enes aules, cau tornar a reflexionar sus era sua preséncia.En Catalonha es centres educatius an autonomia entà decidir sus er emplec deth mobil, airina que produsís polemica, mès es centres an ara sua disposicion ua sòrta de documentacion que les amie ad aquera reflexion. Èm en ua societat cambianta e per tant repompís ena escòla e en aguesta linha calerie aprigondir e analisar es possibilitats qu’auferissen es mobils ena milhora dera practica educatiua. Es centres son capables d’adaptar-se as naui rèptes qu’auferís eth sègle XXI, mès sense enludernar-se, tot ena sua mesura, tamb un usatge responsable, coma dar-li responsa ara utilizacion d’aguesti dispositius que milhor que siguen de supòrt, que servisquen de motivacion entà bèri escolans e ath madeish temps permeten introdusir naues metodologies qu’afavoriràn es aprendissatges.Coma ditz er Informe annau 2023 dera Unesco que per un costat es tecnologies digitaus pòden milhorar era implicacion der escolanat, mès tanben i a risques, ja qu’un usatge excessiu pòt auer un impacte en rendement academic. Era proïbicion deth mobil en classa s’esten per Euròpa a compdar der 1 de gèr de 2024, païsi coma Itàlia, Olanda, França,… I cau tornar a persutar, er ahèr ei plan fonamentau, ja qu’influís ena educacion dera nòsta mainadèra!!!