Er esquí

Començam era tempsada d’esqui en Aran tamb era dubertura era dimenjada passada dera estacion de Baqueira- Beret. Era nheuada dera setmana passada e era baishada de temperaturas a dat pas a poder hèr nhèu e perméter qu’era estacion daurisque es sues pòrtes, tamb emocionantes nauetats en tot milhorar es installacions e es servicis qu’aufrís. Açò signifique qu’eth territòri ei prèst, ua naua oportunitat entath sector toristic. Ei un des motors economic e laborau. E ara se presente aguesta setmana dera Purissima considerada coma ua des cites classiques deth torisme que practique er esquí o quinsevolh auta activitat restacada tamb era nhèu. Era coïncidéncia en calendari de dus dies festius entre setmana, dimèrcles e diuendres, permet hèr plan combinacions entà hèr ua escapada entath Pirenèu, causa qu’afavorirà as servicis de restauracion, ath comèrç, ara madeisha estacion e ad aqueres empreses dedicades ath torisme deth territòri.Es comarques de montanha aufrissen en sòn ensem, uns importants atractius naturaus: paisatge, rius, bòsqui e nhèu entre d’autes, que son es recorsi basics dera aufèrta toristica. Es aranesi podem èster erosi d’auer ua estacion que mos permet gaudir d’un entorn naturau fantastic, tractat de manèra sostenible, apròp de casa, es nòsti mainatges se divertissen tamb era nhèu e aprenen a convíuer tamb era. Er iuèrn ei long en Aran, mès era practica der esquí daurís ua hièstra ar espòrt. Un espòrt qu’en familha, tamb amics o solet, ei plan beneficiós entath organisme, dident que libère de tensions e redusís er estrès. Esquiar ei un exercici plan complèt. Dus en un: gaudís dera montanha e suenha era tua salut!