Hèsta d’Aran

Mos trapam en plea setmana de celebracions ath torn dera Hèsta d’Aran, hèsta nacionau, en tot commemorar er aniversari dera restitucion dera maxima institucion aranesa, eth Conselh Generau d’Aran, tamb era recuperacion deth nòste autogovèrn enes eleccions de 1991. S’amien a tèrme presentacions de libres, teatre, liuraments de prèmis, gessudes entara natura, talhèrs entà mainatges, espectacles, concèrts,…Hè 33 ans qu’aguest dia cuelhem es pendons des terçons, division geografica d’Aran, e en desfilada baisham des dera Plaça d’Aran de Vielha enquiath Santuari de Santa Maria de Mijaran entà realizar es actes institucionaus dera hèsta. En acte i aurà es parlaments corresponents dera Sindica e de bèth/bèra convidat/da de dehòra deth país, generaument bèth representant dera Generalitat de Catalunya. Des de hè uns ans s’a instituït eth prèmi 17 de junh en reconeishement e arregraïment a persones, collectius o entitats qu’an subergessut pes servici prestadi e ei en aguest moment quan se liure. Despús enes roeïnes deth santuari aurà lòc era lheuada deth drapèu e sonarà er Imme dera Val d’Aran, Montanhes araneses. E coma punt finau ua mòstra des dances tradicionaus araneses.Ua data que mos diferéncie dera rèsta de territòris, pr’amor qu’auem un Conselh Generau, ua cultura e lengua pròpria. Escadença qu’auem d’aprofitar entà exigir ara rèsta de Catalunya protegir-la e defener-la, fòrça viatges desbrembada, volem deféner eth dret deth pòble aranés e protegir eth sòn futur. Tad açò cau es mieis e era implicacion de toti, atau coma en 1313, quan Jaime II signaue era Querimònia, carta Magna des aranesi e artenhie que toti es monarques confirmèssen succesivament es privilègis!