Cambis

Dempús d’un temps, en ven un aute, ditz era saviesa popular. Un arrepervèri que respon ar idèa coneishuda der Eclesiastès o Coèlet sus es causes qu’an eth sòn moment: “Tot a eth sòn moment, dejós deth cèu i a un temps entà cada causa”. Era sapiença des antics demore entà illustrar es moments que viuem. En aguesta setmana, venguem de hèr efectives, enes Ajuntaments e eth Conselh Generau, es constitucions des naues corporacions, damb fòrça novetats e lideratges, en ua màger part, entàs equips d’Unitat d’Aran. Dempús de vints ans de govèrns entestadi peth sindic Carlos Barrera (de Convergéncia Democratica Aranesa), pren ara eth testimòni eth sindic Paco Boya damb ua majoria absoluta incontestabla, que reflectís es talents e es besonhs de cambi e renauiment d’un projècte de país que comence a dar ua mielhor responsa as sòns rèptes collectius, que non son pògui ne facils. Era majoria ei, ara fin, un mecanisme democratic qu’apòrte estabilitat ara governabilitat, cèrtament, mès tanben permet formar equips ath servici d’una governabilitat mès cooperadora e transversau. Totun, çò d’important ei era actitud des sòns governants, eth sòn compromís etic e era responsabilitat qu’aquerissen damb er ensem dera ciutadania, damb era consciéncia que, coma afirmèc eth sindic en sòn parlament d’investidura, ací i son de pas, “erèus d’ua tèrra” que, en miei dera actuau societat plurau e fugaç, auem de suenhar per miei dera “memòria” entà deishar-la as generacions futures, pr’amor que, coma eth libre biblic sentencie, “ua generacion se’n va, e ua auta ven, mès era tèrra se manten tostemp”.