Passion esportiva

Tot just venguem de gausir dera prumèra pròva der aperat Freeride World Tour que Baqueira Beret a aufrit ath món, damb preséncia e resultats destacadi d’esportistes aranesi, coma eth radiant Abel Moga, tot un joen estudiant, e er anfitrion Aymar Navarro, damb aqueri sauts atrevits peth dessús des penhes, que diboishen linhes supèrbes pes pales arribentes deth Tuc de Vacivèr. Era siluèta d’aguest demore retalhada dauant d’un orizon ludent peth solei d’un dia clar e era rèsta de montanhes dera sèrra pirenènca –coma destaquen tath sudoèst era Maladeta e tar èst eth Barlonguèra!– garnides peth blanc element, coma merite aguesta naua escadença. Era Val d’Aran torne a mostrar-se esplendida e ludrege atau tàs aimants der espectacle e der espòrt, enes modalitats dera nhèu, coma repetirà era imbatibla Marcha Beret, o mès enlà d’aguesta sason, damb era activitat dera corredera, enes diuèrses corses relevantes.

Còs, ment e esperit se reconcilien ací damb era natura dera quau prenem part. Casuaument, dempús dera pròva, m’arribe enes mans un estudi sus er eros platonic deth pensador Gerhard Krüger, que se pregunte s’er uman coneish en vertat era finalitat deth domèni de si, “fidèu ad a eth madeish dauant des lajerades des podèrs cosmics”, coma aguesti esquiaires dessús d’aguestes montanhes. Segontes Krüger, Platon obsèrve qu’es persones que suenhen eth sòn esperit perseguissen diuèrses mètes en pòs dera felicitat e deth sens dera vida, diferentes enes mejans emplegadi, mès unanimes ena passion pera plenitud dera sua condicion umana, ua passion manifestada ena practica, e per açò uns son amiadi entàs negòcis, d’auti ar espòrt, ara filosofia o ar amor: ua passion qu’impère e condicione nòsta rutinària existéncia, damb era fòrça d’un desir (eros) divin.