‘Aware’

Aware, ath delà de significar conscient en anglés, exprèsse en japonés eth sentiment pregon provocat pera beresa efimèra dera natura. Ei era paraula qu’emplegue eth montanhaire Gerard Olivé entà titolar eth documentau dedicat ara sua grana passion: contemplar era montanha d’ençà deth sòn bivac de nautada, sustot en iuèrn. Era montanha exercís ua atraccion dificila de véncer, qu’Olivé, de vida senzilha, veïcule per miei d’aguesta modalitat tanplan singulara, laguens der alpinisme: era de caperar-se ben ath cap dera sèrra, fòrça viatges a mès de tres mil mètres de nautada, en iuèrn deth Pirenèu.

Era creativitat der autor, que ven de presentar era sua òbra en espaci d’Era Audiovisuau, se desplegue en aguest trabalh inspirador, capable de transméter, a trauèrs dera sua istòria personau, eth sentiment pregon dera soledat der uman dauant deth solei que ges o se cògue darrèr deth perfil dentat dera sarrada pirenènca, damb aqueri tons arròis tan intensi e momentanèus. Gerard ei un montanhaire conscient; tot s’ac premanís metodicament entà passar 14 ores laguens d’un sac, mès tanben ei onèst en coheissar que, coma toti, pòt quèir ena imprudéncia, coma en dia en qué auec d’èster rescatat dempús de calar-se en ua canau deth Punta Alta entà sajar de recuperar aqueth sac qu’auie volat per ua buhada susvenguda. Era montanha ei fòrça viatges immisericòrde, segontes explique quan rebrembe, ja en ostiu, a despiech deth bon pronostic, era maitiada en qué se dresvelhèc, naut deth Gran Bachimala, en veir ludrejar, damb bues, es equips de fotografia e es ròques deth tuc, signe inequivòc dera queiguda imminenta d’un relampit, deth quau se’n poguec sauvar.