Eth sòni

Tornam tà Davos. Era actualitat mos i pòrte a trauèrs deth Fòrum Economic Mondiau. Mès tanben era filosofia a agut aquiu eth sòn scenari entara divergéncia. “Mentre Cassirer, endrabat en ua manta cauda de pèth de camelh, demoraue en balcon dera sua cramba d’otèl [..], coma Hans Castorp en Era montanha magica, Heidegger passaue cada menuta qu’auie liura damb eth sòn companh esquiaire Riezler”, escriu Eilenberger en Temps de magues. Deth debat entre andús, diden qu’en gessec guanhador un vigorós Heidegger, mès, damb eth temps, un ja non sap se quina podie èster era responsa mès avienta entara pregunta essenciau, en aguest combat entre er òme simbolic de Cassirer, en constant intercambi culturau, e eth Dasein angostiós de Heidegger, que campe tàs abismes dera existéncia. Un an abantes, en 1928, eth joen Martin i impartie un cors, mentre Rudolf Carnap s’i guarie, en tot descurbir “ua colossau broma metafisica” laguens dera quau sonque i auie un arren absolut. Era pregunta per arren ère tà Heidegger fonamentau, quauquarren banau tà Carnap. Atau ac referís Karl Sigmund en libre Eth sòni deth Cercle de Viena, eth cercle filosofic que proclamaue era cosmovision scientifica coma fonament de quinsevolh sistèma de pensament, sense bromalhs escurs, pr’amor qu’era realitat a d’èster accessibla ar òme, en un procès d’esclariment, aperat empirisme logic. Referents en sigueren Ernst Mach, defensor der ego insauvable, en un món de sensacions, o Ludwig Boltzmann, que deploraue era escuretat de Hegel e Schopenhauer. Wittgenstein siguec desirat entà entrar en cercle. Totun, aguest trabalh rigorós auie coma mission superar era metafisica per miei dera analisi deth lenguatge, a on eth lenguatge corrent confon es nocions abstractes damb es objèctes fisics concrèts, coma eth procès d’aguest sòni que volie plaçar era sciéncia ath servici dera vida, mentre “era vida l’abrace”.