Nau de cada dètz ectarèes de bòsqui d'Aran son publiques

Era Val d’Aran ei eth territòri damb mès proporcion de superfícia forestau de titularitat publica de Catalonha, segontes donades der Observatòri Forestau de Catalonha de 2022, qu’apunten a que nau de cada dètz ectarèes de bòsc des 62.040 (un 91,2%) ne son. Era mieja catalana ei de sonque un 24%. Eth Conselh Generau, amassa damb eth Centre de Sciéncia e Tecnologia Forestau de Catalonha, trabalhe aué dia en un ambiciós projècte tà reactivar era gestion forestau sostenibla des bòsqui dera zòna, damb eth prètzhèt d’activar era bioeconomia e contribuir ara transicion ecologica.

Aguest projècte, nomentat BòscAran, includís centres logistics de biomassa, hilats de calor e tecniques de silvicultura adaptades a zònes de montanha. Inicièc aguest ostieu ua pròva pilòt tà extrèir husta de bòsqui en Les mejançant un cable aerian de 400 mètres de longada, mentre qu’eth següent pas, qu’impulse ara, consistís en catalogar mès de 3.000 ectarèes de superfícia forestau. Se tracte d’un pas prealable tà definir actuacions tà milhorar era salut des bòsqui atau coma tà planificar profitaments silvicòles. Per ara, es bòsqui que seràn objècte d’aguesta naua metodologia de planificacion se trapen en Vielha e Mijaran (1.005 ha), Les (1.821 ha) e Vilamòs (274 ha). Eth document resultant contribuirà a ua milhor definicion d’objectius e ara traçabilitat des decisions ena planificacion deth projècte.

Eth projècte BòscAran siguec reconeishut aguesta setmana damb eth prèmi Conama, en marc deth Congrès Internacionau deth Mèdi Ambient celebrat en Madrid. Eth conselhèr d’Infraestructures, José Luis Boya, diguec que “eth projecte a d’ajudar-mos a auer uns bòsqui mès resilients ath cambi climatic, mentre auançam ena descarbonizacion”.