Mès de 530.000 èuros tara milhora des sies depuradores d'Aran

Eth Conselh Generau d’Aran invertirà enguan mès de 530.000 èuros ena milhora des sies estacions depuradores dera Val. Se tracte des equipaments de Bossòst, Les, Naut Aran, Vielha, era que compartissen es nuclèus d’Escunhau e Bagergue e era qu’aufrís servici a Arròs, Aubèrt e Canejan. Eth sistèma de sanejament dera Val, gestionat peth Conselh Generau d’Aran, ei constituït per estacions depuradores d’aigües residuaus (EDAR) que dispausen d’un tractament biologic de hanga de mieja carga sense eliminacion de nutrients. Entre es diuèrsi projèctes ei prevista era automatizacion des pòrtes d’entrada des estacions, subsituïr bombes enes entèstes, cambiar es de recirculacion e purga, atau coma es caudalimètres de recirculacion e gessuda, quauqu’ues des quaus aufrissen lectures anomales peth pas des ans e er usatge des installacions, e errors de lectura constants. Per aquerò era actuacion contemple era substitucion de diuèrsi equips tà mantier es installacions damb tecnologies mès actuaus.